Liu husi historia badak ida ne’e, hau hakarak konta-sai kona-ba esperensia Viajen ba Tutuala, iha tasi ibun Valu, durante loron rua hamutuk ho hau nia kolega sira. Viajen ne’e hahú iha loron Sexta Feira dader, maijumenus tuku Sanulu (10.00 AM), ami komesa hakaat ain husi sidade Dili, halo viajem ba Lospalos hamutuk ho profesor Celso da Fonseca ho maluk estudante Relasaun Internasional-UNTL nain sanulu resin ida. Ho hau nia kolega sira, hau senti kontenti tamba halo viajen ba fatin furak ne’e, maske gasta maizumenus oras ualu iha dalan, husi Dili ba Munispiu Lautem, hau senti kolen no dukur tamba viajem dook maibe hau iha interesante tebes hakarak halo viajen ba Tutuala.
Foto ida ne’e hasai iha Poisada, iha tempu dader, molok loron matan sae. Fatin furak, hateke husi foho leten, ba tasi ibun.
Helia, konta nia esperensia durante halo viajen ba Tutuala
Bainhira komesa halo viajen, ha’u hahú husu ba ha’u-nia an ho intensaun kuriozu hakarak hatene saida maka importante kona ba Lospalos, entaun iha momentu ne’ebá bainhira ami nia viajen to’o iha Lospalos ha’u haree nakonu ho plantasaun nuu hanesan iha tempu uluk komunidade sira uza hodi prodús sai mina.
Ho observasaun ida ne’e hamosu ideia ida iha ha’u-nia hanoin, kuandu haree ba kotuk, iha tempu uluk komunidade Lospalos sempre fa’an nuu iha merkadu no iha fatin seluk, no ema barak maka sosa hodi konsumu tanba nuu nia morin naturál no orgániku no bainhira uza halo modo sente iha sabór naturál no gostu.
Produtu nuu ne’ebe kuda iha Lospalos konsidera mos hanesan area produtór ho potensia bo’ot hodi produz nuu ho kualidade diak iha Timor-Leste. Hare ba rai ida ne’ebe uniku, ho potensia natureza produsaun nuu, nudar razaun ida, aumenta hau nia vontade, ho kontenti nafatin kontinua halo viajen, komesa husi Lospalos too iha Tutuala. Iha dalan, hau senti anin fresku husi natureza nia furak. Iha area Lospalos, tuir dalan hau komesa bisu-bisu iha hau nia laran katak rai ne’e furak demais no ho natureza matak, rai bokur bele kuda aihan oi-oin, dezenvolve produtu agrikultura.
Bainhira viajen besik too ona destinasaun ne’ebe ami mehi atu vizita, too iha fatin ne’e (Tutuala), abu-abu komesa mai ho taka kalohan, senti rai-hun nakukun kalan nian too mai dadauk ona. Ho razaun ida ne’e, entaun ami deside atu deskansa iha fatin Tutuala, aldeai Cailoro.
Hamrik besik iha plaka dalan ba koperativa Valusere iha liman karuk no ba iha peskador sira, iha liman loos
Agradese tamba familia husi professor Celso da Fonseca simu ami ho di’ak, depois iha loron sabadu dader ami prepara-an kontinua aranka ba fatin turismu, furak ho ambiente ailaran, tasi ibun ne’ebe furak iha Valu sere, no iha ne’eba bele hateke besik illa kiik ida, nakonu ho raihenek mutin, illa ida koñesidu ho hanaran Jaco, no iha ne’eba ami hakarak lao ain hodi hare’e area iha Valu ne’ebé maka furak tebes hodi atrai turista sira ho natureza nia furak no anin nia fresku husi tasi laran.
Durante viajen iha Tutuala, hau kontenti loos no sei lembra nafatin natureza nia furak iha hau nia hanoin.
Celso'Personal Blog 
One thought on “Ami nia esperiensia durante halo viajen iha Tutuala.”