Reasaun Politikus no Polisia kontra Manifestasaun Pasifiku

Iha fulan ida nee, mosu asaun protesta anti politika hariku-an. Asaun manisfestasaun hasoru membru parliementu. Publiku hotu akompana asaun koletivu husi Movimentu Nasional Aliansa Maubere, sira mai iha parliementu nian oin, halo asaun protesta (manisfestasaun pasifiku) hasoru deputadu sira. Manifestasaun sira kontra polítika parlamentár ne’ebé gradualmente sosa kareta luxu no lei pensaun vitalista ne’ebe konsidera hanesan politika kanten ba”hais povu nia osan”.

Asaun protesta ida ne’e, hamosu polémika sosiál husi politikus, grupu deputadu sira ne’ebé fo’o reasaun negativu ba terminolojia linguajen ne’ebe provoka reasaun deskontenti. Hanesan termu “naokten, koruptor, kanten,” liafuan hirak ne’e sai husi manifestsnte nia ibun, fo’o labelling ba makaer ukun, liu-liu ba membru parlimentu sira.

Reasonista ida husi membru parliementu foti kestaun ida ne’e no fo’o julgamentu diskriminativu ba ema sira ne’ebe expresa ho linguajen (tuir versaun ukun nain sira) ida ne’e iha konotasaun negativu. Membru parliementu ne’e haktuir katak protesta, uza lian kroat hirak ne’e identiku ba ema ne’ebe mai husi “família pro autonomia ho Indonézia, ka grupu anti-independensia”. Ho argumentu prematura, la tetu didiak, deputadu refere ho subjetivamente temi diretor ONG Nasional Yayasan HAK nia naran. Ho diskriminasaun no estigmasaun, mosu reasaun ba ninian deklarasaun ba parlamentu nasional relasiona ho injusta sosial, gasta no aloka osan povu nia ba interese grupu membru parliementu sira. Nudar organizasaun iha area direitus umanus, nia funsaun mak halo servisu (kontrola sosial), atravez halo kritika ba kualker asaun politika no legislasaun ne’ebe la justu, ida nee inkestionavel iha ne’ebe deit sempre mosu hanesan nee.

Ida ne’e mak akontese iha Timor-Leste, bainhira ema ne’ebé kontra instituisaun estadu nian, dala barak polítikus sira halo reasaun negativu no hatán ho ofensa verbal diskriminativu, temi sira nia luta, heroi no julga ema seluk ho liafuan “anti pro-independensia” ka temi Milisia nia oan.

Liga ba motivasaun husi manifestasaun, kritika sosial sira, logikamente, publiku observa katak halo asaun protesta husi manifestante sira mai ho idea razoavel, kritika polítika no programa ne’ebé la apropriadu. Iha razaun simples, bainhira sosiedade sira sofre, moris nafatin iha mukit, ki’ak, sira iha direitu hodi hamrik kontra politika governu iha nasaun demokratiku hanesan Timor-Leste. Sira ejize, direitu ba justisa sosial, hanesan falta ai-han, bee, no asesu ba servisu saúde, estadu nia obrigasaun hodi hakonu.

Asaun protesta ne’e hanesan simbolu reasaun dez-konkordansia hodi ejije, korije, fo hanoin ba maka’er ukun, hanesan reprezentante povu nian (deputadu) hodi konsidera injustisa sosiál sira-ne’e molok deside atu gasta osan ba buat ruma ne’ebé la nesesáriu, hanesan uza karreta luxu. Iha tempu hanesan, Timor-oan barak mak moris kiak, no taxa dezempregu sa’e kada tinan-tinan. Nune’e mos laiha garantia ba asesu ba servisu no maioria povu sofre, laiha kondisaun ne’ebe dignifika sira nia moris.

Tanba senti diskontenti, mosu liafuan balun hanesan “naokten” mai husi manifestante sira, akompana iha situasaun hirus tanba membru parliementu sira kria lei “irrasional rua” ne’ebé la’ós bazeia ba prinsípiu “justisa no igualdade”; ida-ne’ebe fó de’it priviléjiu no benefísiu espesiál ba polítiku nain sira.

Razaun primeiru mak karreta luxu ida-ne’e klaru no kestaun segundu mak pensaun vitalista neebe fulan-fulan sira hetan privilejiu sira ne’e, liu-liu ba eis-titulares sira hanesan membru Parlamentu. Ida-nee ironiku tebes katak prátika alokasaun osan ne’e aplika de’it ba grupu balun deit. Tuir loloos, Timor-Leste ho kondisaun orsamentu nasionál ne’ebé la-sufisiente atu sustenta nasaun ida neenia futuru, osan povu nia tenke jere no aloka ba programa prioritariu povu nia.

Dala ida tan, atu reforsa argumentu públiku, razoavel tebes katak dezigualdade iha aplikasaun polítika no lei, fó vantajen barak liu ba polítikus ne’e hanesan formalmente kria hela pratika katastropia ka dezastre bo’ot ida. Nunee, Aliansa Maubere Nasional (AMN), inklui juventude, defensór direitus umanus, sosiedade baibain, veteranu sira, polítikus balun, no Prezidente Timor-Leste rasik kontra polítika nee. Por-ezemplu, iha tinan ida-ne’e grupu veteranu balun propoin ba Prezidente atu hasai “lei pensaun Vitalista” tanba lei ida-ne’e diretamente ameasa nasaun ne’e nia futuru. Nune’e mos fulan hirak liubá, iha Junu 2022, Prezidente Timor-Leste konkorda katak pensaun vitalista la relevante ho sustentabilidade ekonomia rai laran, lei la apropriadu ida ne’e tenke halakon.

Tan ne’e argumenta prinsipál rua husi manifestante sira-ne’e hatudu katak, la iha razaun atu hapara, amesa no halo tratatmentu a’at ba sirania asaun. Maske iha lei manifestasaun, distánsia uza manifestasaun ho metru 100, no karik mós termu radikál balun kona-ba língua ne’ebé deputadu sira konsidera ladún etiku, ne’e la’ós krime, ofensa subjetivamente ba ema ruma nee nunka mais kriminaliza iha nasaun demokrátiku wainhira motivasaun ka razaun ne’e klaru tanba iha lakunas legislasaun balun neebe la benefisia nain ba direitu sira (Right Holder) no maker ukun (Duty Bearer) tenke kumpri duni.

Agora, ita tenke argumenta katak manifestante sira halo sira-nia knaar, ezekuta funsaun kontrolu sosial, hala’o sira-nia direitu, no protesta ba buat ruma ne’ebé la justu. Tanbasá mak sira tenke hapara, ka tanbasá mak Polisia uza sira-nia forsa atu hapara.

Iha situasaun ida ne’e, hau katak Polisia la respeita kontra ona valor direitus umanus, liuliu uza forsa la-ho proposional hasoru manifestante sira. Se ita observa saida mak akontese iha vídeo ne’ebe publika iha media sosial, Polisia ataka manifestante sira no trata sira ho maniera a’at, dez-umanu.

Hau akompana hela, wanhira iha kampus Universidade Nasional Timor Lorosae-UNTL, hau hare ho matan, membru Polisia ida, hatais kalsa badak, hanesan ema civil, halai, duni, no koko atu kaer estudante ida to’o tama iha komplek kampus UNTL. Nune’e mos, sira halo pasa ravista ba estudante sira iha area kampus. Hau hatene katak kampus iha autonomia rasik, no foin dadauk mosu polemika tanba magnifiku retor UNTL argumementa, bele halo manifestasaun maibe mos hare kondisaun aprendijajen iha aula lable prejudikadu. (Hau sei la analiza no diskute asuntu ne’e, tanba balun bele sala interpreta).

Fila fali ba asaun Polisia nian katak, manifestante sira, bainhira polísia detein, kaer no trata/aproxima ho asaun represivu ka ho forsa. Ezemplu iha video ne’ebe viral media sosial, polisia kaer manifestante sira, dada, balun dudu,obriga sae ba iha kareta laran, ate iha video ne’e hatudu manifestante ida hetan kanek; ida nee hatudu momos katak iha tratamentu dez-umanu. Buat ne’ebé Polisia halo hodi asegura demonstrasaun ne’e iha forma violasaun direitus umanus, polisia la asegura manifestante sira ho diak, sira hetan tratamentu ne’ebé la adekuadu mesmu sira iha liberdade espresaun no direitu atu espresa opiniaun iha publiku ba politiku nain sira tuir lei, normas no valor ka prinsipiu demkorasia ne’ebe vigor no aplika iha Timor-Leste.

Alende regra hirak ne’e, iha Timor-Leste, Politika nasional ba insitiusaun Polisia Nasional Timor-Leste adopta ona prinsipiu no Padraun no Pratika Direitus Umanus ne’ebé mai husi instrumentu legál direitus umanus hotu-hotu hanesan Direitu Sivil no Politiku, Lei Direitus Umanus Anti-Tortu no Kruel no Tratamentu ka Kastigu De-umanu ka Degradante, no lei internasionál relevante sira seluk.

Nune’e mos Timor-Leste kumpri lei padraun Internasional sira hanesan Kodigu Konduta ba Ofisial Ezekusaun Lei nian ne’ebé aprova ona iha Rezolusaun Asembleia Jeral 34/169 17 Dezembru 1979 inklui mekanismu no padraunrelevante sira seluk husi ONU no pratika lei internasional umaniter nian.

Prinsipiu legál sira-ne’e hotu define no hauur regulamentu internal, konduta Etika no Juridika Asaun Polisia nian.  Ida-ne’e simples tebes, Polisia hotu-hotu tenke atua bazeia ba prinsipiu no  lei ne’ebe vinkulativu iha rai ida ne’e. Sira tenke respeita no proteje dignidade umana. Asaun polísia hotu-hotu tenke respeita prinsípiu legalidade, nesesidade, la-halo diskriminasaun, proporsionalidade no umanidade.

Padraun hirak ne’e klaru; husi asaun nee ita bele dada ka halo argumentu simples katak Polisia tenke fó protesaun ba seguransa publika no direitus umanus ema hotu-hotu nian bazeia ba imparsialidade, serve ema hanesan membru komunidade no sempre prezume ema hotu nu’udar inosente to’o provadu hetan sala iha julgamentu tuir lei ne’ebé justu.

Buat ne’ebe akontese dadauk sai lisaun bo’ot ba ita nia rai, kada tinan Polisia sira sempre tuir formasaun oi-oin, liga ba padraun internasional, lei-direitus umanus sira. Maibe iha pratika, asaun dez-umanu, diskriminasaun sempre mosu, no prejudika funsaun polisia nia, to’o ikus ita bele julga polisia nia funsaun tuir lolos ne’e lao oinsa? Envesde ho neutru, imparsial, asegura ema hotu, liu-liu husik povu hakilar sira nia direitu, tanba rai ida ne’e presija tenke iha kontrola sosial. Kestaun propriedade ka direitu sosial sira, hanesan osan povu nian, tenke aloka ho loos, se lae manifestasaun sei kontinua nafatin tanba mosu kondisaun injustisa iha rai ida ne’e.

Advertisement

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: