Asaun hapara manifestante, oinsá Polisia hala’o nia knaar?

Iha semana hirak liu ba, iha fulan Novembru 2022, Hau akompaña hela, bainhira iha kampus Universidade Nasional Timor Lorosae-UNTL, ha’u hare ho matan, membru Polisia ida, hatais kalsa badak, hanesan sidadaun sivíl, halai hodi duni no koko atu kaer estudante ida to’o tama iha área kampus UNTL. Nune’e mós, sira halo pasa revista ba estudante sira iha área kampus. Ha’u hatene katak kampus iha autonomia rasik, mezmu iha polemika oituan entre estudante UNTL ne’ebe envolve iha manifestasaun nee. Prezensa Polisia iha Kampus ne’e dada hau nia atensaun atu ekplora kona-ba profesionalismu Polisia sira nian, liu-liu oinsa atu atua manifestante sira.

Observsaun husi hakrek nain (Celso da Fonseca)

Situasaun ne’ebe akontese iha fulan Novembru 2022, membru Polisia Nasional Timor-Leste (PNTL) iha terenu, intervein manifestante sira ho asaun agresivu. Aktu Polisia hirak ne’e sai interesante ba hau atu buka hodi komprende saida mak akontese no oinsa membru Polisia sira ne’e halao nia funsaun ho profesionalismu.

@arte silensia@_Iha ilustrasaun ne’e hatudu katak maluk Polisia sira ne’e hatudu sira nia ezemplu d’ak, mai ho klama, akompana maluk artisita sira ne;ebe expresa sira nia hanoin. Mezmu balun hare nia kontedu ne’e kritika oituan, maluk Polisia sirahare, kontente no laiha reasaun negativu ida.

Iha situasaun ida ne’e, ha’u nota katak Polisia la respeita no kontra ona valór direitus umanus, liuliu uza forsa laho profisionál hasoru manifestante sira. Se ita observa saida mak akontese iha vídeo ne’ebé públika iha média sosiál, Polisia ataka manifestante sira no trata sira ho maneira kontra dignidade umana.

Fila fali ba asaun Polísia ne’ebe detein, kaer no trata/aproxima ho asaun represivu ka ho forsa ba manifestante sira. Ezemplu iha video ne’ebé sai viral iha media sosial, polisia kaer manifestante sira, dada, riba, balun obriga ho forsa dudu-obriga sae ba iha kareta laran, ate iha video ne’e hatudu manifestante ida hetan kanek; ida nee hatudu momos katak iha tratamentu dez-umanu.

Aktu husi (oknum) Polisia balun hatudu katak iha forma ka asaun violasaun direitus umanus. Polisia la asegura manifestante sira ho di’ak, sira hetan tratamentu ne’ebé la adekuadu, mesmu sira iha liberdade espresaun no direitu atu espresa opiniaun iha públiku ba politíku nain sira tuir lei, normas no valor ka prinsípiu demkorasia ne’ebé vigor no aplika iha Timor-Leste.

Alende regra hirak ne’e, iha Timor-Leste, Politíka nasional ba Instituisaun Polisia Nasional Timor-Leste adopta ona prinsipiu no Padraun no Prátika Direitus Umanus ne’ebé mai husi instrumentu legál direitus umanus hotu-hotu hanesan Direitu Sivil no Polítiku, Lei Direitus Umanus Anti-Tortu no Kruel no Tratamentu ka Kastigu De-umanu ka Degradante, no lei Internasional relevante sira seluk.

Nune’e mos Timor-Leste kumpri lei Padraun Internasional sira hanesan Kodigu Konduta ba Ofisial Ezekusaun Lei nian ne’ebé aprova ona iha Rezolusaun Asembleia Jeral 34/169 17 Dezembru 1979 inklui mekanismu no padraun relevante sira seluk husi ONU no pratika lei Internasional umanitariu nian. Prinsipiu legál sira-ne’e hotu define no hatu’ur regulamentu internal, konduta Etika no Juridika Asaun Polisia nian.  Ida-ne’e simples tebes, Polisia hotu-hotu tenke atua bazeia ba prinsipiu no  lei ne’ebé vinkulativu iha rai ida ne’e.

Prinsipiu legál sira-ne’e hotu define no hatuur iha regulamentu internal, PNTL tenke konduta Etika no Juridika Asaun Polisia nian tuir padraun legal sira.  Ida-ne’e simples tebes, Polisia hotu-hotu tenke atua bazeia ba prinsipiu no  lei ne’ebe vigor iha rai ida ne’e. Sira tenke respeita no proteje dignidade umana. Asaun polisia hotu-hotu tenke respeita prinsípiu legalidade, nesesidade, la-halo diskriminasaun, proporsionalidade no umanidade.

Padraun hirak ne’e klaru; husi asaun ne’e ita bele dada ka halo argumentu simples katak Polisia tenke fó protesaun ba seguransa públika no direitus umanus ema hotu-hotu nian bazeia ba imparsialidade, serve ema hanesan membru komunidade no sempre prezume ema hotu nu’udar inosente to’o provadu hetan sala iha julgamentu tuir lei ne’ebé justu.

Buat ne’ebé akontese dadauk sai lisaun bo’ot ba ita nia rai, kada tinan Polisia sira sempre tuir formasaun oi-oin, liga ba padraun Internasional, formasaun noseminar kona-ba papel Polisia nia tuir prinsipiu no lei-direitus umanus sira. Maibé iha pratika, asaun dez-umanu, diskriminasaun sempre mosu, no prejudika funsaun polisia nia, to’o ikus ita bele julga polisia nia funsaun tuir lolos ne’e lao oinsa? Envez de ho neutru, imparsial, asegura ema hotu, liu-liu husik povu hakilar sira nia direitu, tanba rai ida ne’e presija tenke iha kontrola sosial. Kestaun propriedade ka direitu sosial sira, hanesan osan povu nian, tenke aloka ho loos, se lae manifestasaun sei kontinua nafatin tanba mosu kondisaun injustisa iha rai ida ne’e.

Maibe, asaun protesta husi sidadaun ameasada no bele mout tanba karik mosu traumatiku husi aktu oknum Polisia balun ne’ebe laiha profesionalismu hasoru manifestante sira. No ida ne’e bele prezudika tebes balansiu kontrola sosial iha nasaun RDTL. Mesmu asaun protesta sosiál jerálmente ita hare “nudár veíkulu demokrasia, (Vehicle for democracy). Nune’e mos saimeius ida ba grupu ou entidade minoria, marjiniladu, grupu interesadu atu alkansa sira nia objetivu ba egualidade no justica” iha Timor-Leste.

Espera iha futuru maluk Polisia sira sei kontinua aborda ho formasaun no konesementu ne’ebe klean kona-ba sira nia profesionalismu no esperesnia moruk sira konaba tratamentu a’at, violasaun direitus umanus iha Timor-Leste bele elimina.

Celso da Fonseca

Advertisement

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: