Vantajen literasia: Motiva foinsa’e no estudante sira hodi lee no hakerek krítiku

Fahe ha’u-nia esperiénsia iha Movimentu Letras kona-ba vantajen literasia  ba estudante no foin-sa’e sira nudar oportunidade di’ak, aprende hamutuk, motiva maluk joven sira kona-ba importansia le’e no hakerek kritiku.

Aprezentasaun kona-ba vantajen literasia ba foinsa’e no estudante universitariu sira iha Movimentu Letras

Hau nia prezensa iha Movimentu Letras iha domingu, horseik (12 Junu 2022) sai momentu interesante atu ko’alia ho foin-sa’e no estudante universitariu sira kona-ba importánsia literasia ba jerasaun foin-sa’e sira iha sosiedade Timor-Leste no liu-liu iha vida akadémiku. Topiku ne’ebe prepara husi ekipa organizador foka ba “vantajen literasia”. Hau koko atu formula hau nia aprezentasaun ho ideia pragmatiku, oinsa nudar ema pratisioner ida, iha prátika moris loron-loron halo leitura no hakerek ho artigu simples kona-ba asuntu oi-oin.

Ha’u-nia aprezentasaun iha sesaun permeiru lao ho amijavel tuir ritmu ambiente hakmatek iha salaun movimentu letras. Partisipante sira iha votande korioju durante oras tolu nia laran hakmatek, rona buat ne’ebe hau fahe iha sesaun materia aprezentasaun. Maneira aprezentasaun lao ho kalma, interativu no evita termus akadémiku atu asegura katak partisipante sira sei la sente baruk ho ha’u-nia diskursu.

Nu’udar professor iha Universidade publiku hanesan Universidade Nasional Timor Lorosa’e (UNTL), hau rekonese katak ambiente akademiku, mezmu sai hanesan fatin uniku ba foinsae sira atu aprende siensia (aumenta matenek), maibe, fatin institusaun edukasaun formal sira ne’e naturalmente limita-an hodi kria ambiente amijavel ba foinsae sira. Ezemplu iha literasia (hakerek ho imajinasaun) hodi expresa sira nia talentu ladu’un buras iha ambiente akademiku. Kestaun hirak ne’e akontese tanba iha razaun oi-oin, hanesan menus fasilidade, ladun iha flexibilidade no espasu hodi aprende atividade kreativu sira. Nune’e mos tanba kestaun politika, birokrasia administrativu balun neebe la permite  foinsae sira atu hanoin no ekserse sira nia kreatividade iha expresaun hakerek ho opiniaun naun-akademiku (hakerek opinuaun ho jeitu livre/free writing style).

UNTL nudar fatin ne’ebe ha’u dedika ha’u-nia karreira profesional, durante dekada ida nia laran. Hau sempre apresia no orgolu ba buat ne’ebe hau kontribui no hakna’ar-an ho profesaun nudar manorin. Wanhira hetan konvite husi Koordenador Movimentu Letras hodi fahe hau nia idea nudar manorin nain ba foinsa’e sira, ida ne’e sai momentu di’ak husi inisiativa vibrante ida ne’e, fahe ha’u-nia esperensia no koñesimentu pratiku kona-ba le’e no hakerek kritiku ba jerasaun foinsa’e ne’ebe iha talentu ho kreatividade oi-oin.

Atividade hanesan ne’e, ha’u halo barak-ona iha tinan hirak ikus ne’e nia laran. Organizasaun akademiku no grupu volontariu balun konvida ha’u hanesan ema akadémiku, ativista, defensór Direitus umanus sai orador iha semináriu rejionál no internasionál, maibe eventu iha movimentu letras ne’e krusial tebes, tanba fatin neebe konsidera nudar mahon ba aktivista sira ne’ebe produtivu tebes hodi sani leitura no hakerek.

Atividade sani leitura no hakerek, karik ema balun interpreta ba programa alfabetizasaun institusaun governo nian. Programa ho ambisaun bo’ot ne’e akontese iha tinan 10 kotuk liu-ba, iha programa famozu ida hanaran “Edukasaun Universál” husi ajenda dezenvolvimentu globál ho objetivu dezenvolvimentu millenium (Milenium Development Goals), iha objetivu daruak, asegura katak labarik hotu-hotu, pelumenus bele lee no hakerek (abildade literasia) iha nivel primáriu, no mehi bo’ot ida ne’e sei atinje iha tinan 2015, tanba asesu ba edukasaun nudar direitu fundamental ba ema hotu.

Tuir Organizasaun Nasoins Unidas ba Edukasaun, Siensia no Kulturál (UNESCO) karateriza literasia hanesan direitus umanus fundamentál. ” Nune’e mos direitu hirak ne’e garantia iha Konstituisaun RDTL artigu 59 no paktu internasional direitus umanus, ho  Paktu Internasionál kona-ba Direitus Ekonómiku, Sosiál no Kulturál (ICESCR) ne’ebe governu Timor-Leste ratifika iha 2003, garante direitu ba Edukasaun.

Instrumentu legal sira ne’e fo razaun ba estadu atu kumpri no hakonu direitu sidadaun hodi asesu ba edukasaun. Pelumenus sidadaun hotu-hotu bele hakerek no lee. Maibérealidade lao oinseluk, maske hetan independénsia liu dékada rua nia laran, Timor-oan barak mak la bele asesu ba Edukasaun. Aleinde ida ne’e kultura le’e iha Timor-Leste sei menus tebes. Hanesan relata hosi UNESCO no Banku Mundiál katak iha deit 68 posentu jovens ne’ebe hatene le’e no hakerek.

Besik oras tolu, hahú hosi tuku 3 to’o 5.30 lokraik, ha’u-nia aprezentasaun barak liu mak kobre importánsia no vatajen literasia ba joven sira ne’ebé oras ne’e dadaun estuda hela hanesan estudante iha universitariu. Hau aprezenta ho konseitu badak kona-ba terminolojia báziku kona-ba literasia iha tempu agora/kontemporaria.

Konteudu literasia laos deit kobre kona-ba abilidade atu lee no hakerek, maibe importante liu mak oinsa estudante sira iha kapasidade rezolve problema liu husi leitura no hakerek. Ne’e signifika, lee no hakerek  ho maneira kritiku no kreativu ne’e sai pakote krusial iha literasia.

Iha aprezentasaun ne’e, ha’u elabora oituan kona-ba vantajen literasia nu’udar parte nukleu iha sistema edukasaun. Literasia nudar instrumentu fundamental hodi kanaliza koñesimentu ba estudante no foin-sa’e sira iha Universidade paiz ki’ik ida ne’e. Kapasidade atu lee no hakerek ba foin-sa’e sira presiza tau iha atividade regulár loron-loron; liu hosi dalan ida ne’e, sei ajuda ita atu hetan koñesimentu siensia no habelar vokabularia foun iha are oin-oin.

Bainhira lee no hakerek krítiku sei ajuda estudante sira atu absorve ka hetan imajinasaun forte liu kona-ba memória imajinativu no hetan esperiénsia barak, liu-liu hanoin krítiku no analítiku. Nune’e mos, dalan ida-ne’e atu ajuda estudante sira atu identifika opiniaun no faktu kona-ba informasaun, artigu no atu evita argumentu ne’ebé la loos no falla iha sira-nia hakerek no ko’alia.

Aleinde halo aprezentasaun, hau nota pergunta no komentariu interesante sira ne’ebe partisipante balun hato’o mai hau. Maioria sira hato’o pergunta hanesan kona-ba sira-nia sentimentu oinsá lee no hakerek ho maneira krítiku. Balun rekomenda atu kontinua halo semináriu no diskusaun hanesan ne’e iha futuru oin-mai hodi tulun no motiva sira, pelumenus sira bele fiar-an, motiva liutan atu hakerek sira-nia opiniaun.

Hau hata’an ho simples, maijumenus hanesan ne’e:

“ Ba estudante sira, lo’os duni katak Timor-Leste, ita iha problema literasia ne’ebe nia abut mai husi sistema politka kurikulu iha eduksaun, nomos kultura ho vontade le’e livru menus tebes. Maibe importante liu, estundate presija abitua hodi le’e artigu ho kritiku, komprende konteudu artigu no koko argumenta idea foun, bele aseita ideas balun husi livru no kontra ka bai-bain ho terminolojia (teze-anti-teze ho teze-foun). Kultura le’e bele hamosu talentu hakerek, iha hakerek presija ho fluxu estruturadu atu halo artigu ho formatu narasia bele atrai ema le’e ho furak. Importante liu mak estudante presija halo atividade le’e no hakerek hanesan aktu ritual, asuntu rua ne’e presija tau iha vida pratika loron-loron”.

Ikus liu, ha’u haree katak eventu boot ida-ne’ebé organiza husi ekipa Movimentu Letras sai ideia brilliante atu suporta foin-sa’e sira. Rai ida-ne’e presiza edukasaun ho kualidade a’as, ne’ebé dala ruma iha ambiente institusaun formal sira ladun iha oportunidade atu aprende. Maibe espasu publiku ho diskusaun hanesan ne’e, fahe esperensia no aprende hamutuk ho foin sa’e sira presija tebes. Espera katak, foin sa’e barak liu mak sei hetan motivasaun no mantein sira nia talentu abilidade no koñesimentu le’e no hakerek kritiku, nomoos bele kontinua apoia foin-sa’e sira seluk kona-ba programa literasia iha Timor-Leste hodi sai matenek, dezenvolve Timor-Leste diak liu-tan iha futuru.

Celso da Fonseca: Dili, 13 Junu 2022.

Opiniaun privadu no la prezenta instituisaun ne’ebe hau hakna’ar ba.

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: