Dezafiu no Mehi Ambisaun Timor-Leste sai membru ASEAN

Timor-Leste nia mehi atu sai membru Association of Southeast Asian Nations (ASEAN) hahú husi dezde 2002. Pasu ida-ne’e importante tebes atu realiza mehi adezaun ba komunidade ASEAN. Hahú husi tempu ne’ebá, Timor-Leste hetan oportunidade sai nu’udar observadór ba organizasaun rejionál Sudeste Aziatiku. Tuirmai, depois dékada ida, iha 2011, Timor-Leste propoin ona nia karta ofisiál ba sekretariadu ASEAN atu sai membru permanente..

Kompromisu polítiku hodi integra ba organizasaun iha nivel rejionál sai ajenda estratéjiku polítika Timor-Leste. Hahú iha tinan 2019, governu Timor-Leste hala’o kampaña boot ida husi Ministru Negosiu Estranjeiru Timor-Leste hodi aproxima (lobby) nasaun membru ASEAN sanulu atu foti desizaun ho lian ida de’it (consensus) hodi apoia Timor-Leste sai ba parte ASEAN.

Timor-Leste nia pozisaun jeográfika ne’ebé lokaliza iha rejiaun Sudeste Aziatiku nu’udar rajaun kritéria prinsipál ASEAN, no hetan kartaun verde hodi sai membru. Nune’e mós, Timor-Leste nu’udar parte ida husi sosiedade rejiaun ida ne’e. Haree ba aspetu kulturál sira, karakter no orijen, étniku husi komunidade Timor-Leste ne’ebé nu’udar sosiedade ASEAN. Ezemplu ida mak, Timor-Leste, iha nia istória, defaktu iha era pre-koloniál no pos-koloniál iha sékulu 14 liubá, rai Timor ida de’it ho kultura ne’ebé iha ligasaun ba malu. Ezemplu, bei’ala sira, iha tempu (molok Portugal tama mai Timor), eziste ona sistema sosiál ho modelu tradisionál lidera husi reinu sira, ezemplu iha ita-nia istória, mosu reinu boot balun husi Liurai Wehali no Luka, iha parte Viqueque no iha Atambua (agora sai partensia Indonesia) ne’ebé iha ligasaun ba malu.

Bazeia ba faktu no rekezitu simples ne’e, Timor-Leste defaktu sai parte husi ASEAN, maibé besik tinan rua nolu ho balun, nasaun ki’ik ne’e, de-jure nunka hetan rekoñesimentu nu’udar membru ASEAN. Ida ne’e interesante atu haree, fatór saida de’it mak impede Timor-Leste atu hetan rekoñesimentu legál sai nu’udar membru ASEAN?

Maski maioria membru ASEAN sira komprimidu atu simu Timor-Leste sai membru organizasaun rejionál, maibé paiz prinsipál balun ne’ebé iha influénsia boot liu hanesan Singapura rejeita, ho argumentu katak Timor-Leste seidauk prontu hare husi preparasaun rekursu umanu no ekonomia ne’ebé seidauk másimu, maski ekonomikamente Gross Domestic Product-GDP (Produtividade Domestik) Timor-Leste nian di’ak uitoan kompara ho pais membru Laos no Kamboja iha tinan hirak liu ba mesmu agora iha 2022 tu’un. Aleinde ida ne’e, iha 2019, tuir relatoriu United Nations Human Development Index-HDI katak Timor-Leste ho (ranking), tama iha numeru 158, diak liu Cambodia, Laos no Myanmar.

Aleinde progresu ekonomia, politikamente, nasaun ida-ne’e úniku ho índise demokrasia ne’ebé aas entre membru ASEAN sira-nia leet. karik asuntu ne’e bele sai dezafius ba membru ASEAN sira? tanba Timor-Leste ne’ebé demokrátiku, nia prezensa bele mós fó ameasa, uza nia influénsia ho tradisaun liberdade sivíl no polítika ba lider polítiku autoritária sira ne’ebé goza ona sira-nia status quo iha nasaun ASEAN iha tempu naruk nia laran, hanesan Myanmar, Vietnam, Laos, Kamboja, Tailandia, Filipina no membru estadu sira seluk.

Kona-ba kestaun ne’e, simples tebes atu argumentu katak, maizumenus tinan lima liubá, governu ne’e prudente tebes atu hatudu ho nakloke ninia vizaun polítika iha sira-nia polítika esterna kona-ba asuntu internu pais ASEAN balun. Ezemplu konkretu, hanesan governu nia desizaun polítika (la halo intervensaun ba kestaun internál) hatudu ona ho esperiénsia desizaun polítika balun. Liuliu, kona-ba kestaun Direitus Umanus iha Papua Osidental husi governu Indonesia, sistema autoritária no violasaun Direitus Umanus iha Myanmar no problema sistema demokrátiku sira seluk.

Prinsípiu ASEAN nia baze mak “polítika ho prinsípiu  la halo intervensaun iha asuntu internu” husi pais membru sira sai hanesan razaun prinsipál ida husi motivasaun polítika nasaun Timor-Leste atu firmi ho nia pozisaun neutru. Mezmu agora seidauk sai membru ASEAN, maibé hakarak hatudu nia polítika prudente ho estratéjia diplomátiku, porezemplu, iha tinan kotuk, governu Timor-Leste rekuza atu vota ba rezolusaun Asembleia Jeral Nasoins Unidas (ONU) nian hasoru junta Myanmar ne’e hanesan faktu simples ida.

Liu hosi opiniaun badak ne’e, ha’u hakarak argumentu katak, posibilidade iha razaun fundamentál balun husi lider ASEAN sira hanesan Singapura no sira seluk ne’ebé haree katak Timor-Leste seidauk prontu, hare husi kondisaun internál husi ninia kondisaun rai laran sei frazil tebes. Hare husi ezisténsia G7+ nu’udar organizasaun intra-rejional husi grupu nasaun pos-konflitu no estadu frajil ne’ebé oras ne’e lidera no finansia husi governu Timor-Leste.

Iha parte seluk, kuaze tinan ruanulu ho balun, Timor-Leste hanesan nasaun ida-ne’ebé la iha mudansa boot, hadi’a ninia rekursu umanu no infraestrutura ho adekuadu. Ida ne’e bele fó raraun katak kuandu Timor-Leste sai membru, no sei asumi nu’udar uma-na’in (chair) ka lidera ASEAN iha futuru oin mai, sei hetan dezafiu barak.

Nune’e mós, iha tendénsia perspetiva husi autór non-estadu (Non-state Actors) sira husi membru ASEAN, iha atividade importante balun ne’ebé Timor-Leste seidauk hola parte másimu, hanesan iha atividade akadémiku no edukasaun, atividade rede sosiedade sivíl, no atividade sira seluk entre komunidade membru sira.

Atu reforsa argumentu simples ne’e, bele hare husi dezempeñu Timor-Leste nian iha performansia demokrasia no liberdade sivíl no promosaun Direitus Umanus aas tebes. Ida ne’e sai vantajen boot ba sosiedade sivíl, defensór direitus umanus no akadémiku sira iha nivel rejionál, maibé bele konsidera hanesan ameasa foun ida ba polítiku na’in sira hosi membru ASEAN sira, se sosiedade sivíl sira forte tebes ba advokasia promosaun no implementasaun demokrasia, direitus umanus, liberdade direitu polítika sivíl.

Iha parte seluk, hare’e husi perspetiva aspetu ekonómiku, polítika estranjeiru husi nasaun boot sira seluk ne’ebé daudauk ne’e, koko atu influénsia nia interese iha Timor-Leste, sai asuntu importante ba iha jeo-estratejiku polítiku, liuliu mosu ona rivalidade globál entre Xina no Estadus Unidus – ho Australia.

Influensia nasaun bo’ot, hanesan ambisaun husi prezensa Xina nian iha Timor-Leste, liuhosi polítika China’s Belt and Road Initiative (CBRI), ne’ebé governu Cinez fó apoiu fundus, imprestimu no halo konstrusaun edifísiu balun iha Timor-Leste sai ezemplu dezafiu visibel ne’ebe observa husi membru ASEAN. Nune’e mós agora daudauk, polítika governu Cinez ho interese ne’ebé helik iha asisténsia Xina nian no investimentu iha mega-projetu infraestrutura nian balun, bele sai mós sinál ameasa no preokupasaun boot ba membru ASEAN sira, iha futuru Xina bele kontrola nasaun ki’ik ida-ne’e bainhira la bele sustenta ekonomia hanesan akontese iha Srilaka (ne’ebé bankrota), iha fulan kotuk tinan ida ne’e (2022).

Artigu ne’e nu’udar opiniaun inísiu ne’ebé mai hosi autór, no rekomenda karik iha futuru, peskizadór ruma bele kontinua hakle’an liután.

Celso da Fonseca (NOVA@Jar,Dili,Timor-Leste, (22/72022).

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: